DEPRESSİYADAN BEZMİSƏNMİ?

Hər şeyin dəbi olduğu kimi xəstəliklərin də dəbi var. Son zamanlar selülit, anoreksiya (həddən artıq arıqlama), kompyuterdən asılılıq, depressiya  və s. bu  kimi xəstəliklər “dəbdədir”. Bugünkü mövzumuz  belə xəstəliklərdən biri olan depressiya haqqındadır. Öyrənək  ki, bu xəstəlik niyə yaranır, əlamətləri nədir və  bu vəziyyətdən qurtarmaq üçün nə etməliyik?

İnsanın əhval-ruhiyyəsi qanda serotonin adlanan hormondan asılıdır. Sevinc, pozitiv emosiyalar qanda “xoşbəxtlik hormonu” nun  yəni serotoninin miqdarını artırır. Bəzi xəstəliklər, bədbəxt hadisələr isə bu hormonun qanda  miqdarını azaldır və yenidən yaranmasının qarşısını alır. Qanda uzun müddət serotonin olmadıqda insan depressiyaya düşür. Bu hala təkcə insanda deyil fil, siçovul, meymunlarda da rast gəlinir.

Depressiyanın əlamətləri:

• Daim yorğunluq hissi.
• Özünü hər şeydə günühkar bilmə, özünə  dəyər verməmə hissi.
• Pessimist olmaq və ümidsizliyə düşmək.
• Xoşladığınız əyləncələrə marağın olmamağı (dostlarla görüş, gəzinti)
• Yuxu rejiminin kəskin dəyişikliyi (yuxusuzluq və ya yuxudan doymamaq)
• Qida rejiminin dəyişikliyi (iştahsızlıq və ya alkoqola meyl)
• Heç nəyi dəyişə bilməmək hissi.
• Təklikdə qalmağa çalışıb heç kimlə görüşməmək.
• Intihar haqqında düşünmək.

Depressiyanı yaradan səbəblər.

Xəstəliklər nəticəsində: travmalar, maddələr mübadiləsinin pozğunluğu, beyində qan dövranının pozğunluğu (insult və ya ağır qripdən sonra).

Hormon dəyişikliyi nəticəsində: yeniyetmələrdə, doğuşdan sonra, klimaks zamanı .

Günəş işığının azlığı (qanda serotoninin miqdarını azaldır) və təmiz havada az gəzməyin (oksigen beyinin aktivliyinə təsir edir) nəticəsində yarana bilər. Bundan əlavə ayrılıqlar, yaxın adamın ölümü, güclü stress yaşamaq, həddən artıq yorulma, yuxusuzluq, aclıq halı da depressiyaya səbəb ola bilər.

Çalışın ki, başa düşəsiniz sizin depressiyaya düşməyinizə səbəb nədir? Hansı hadisədən sonra siz bu vəziyyətə düşmüsünüz? Bu sualın cavabını tapdıqda problem həll etmək asanlaşır.

Siz nə istəyirsiniz? Bir vərəqdə sizi narahat edən - yəni  özünüzü xoşbəxt hiss etməyinizə  mane olan səbəbi yazın və düşünün siz bunu dəyişmək üçün nə edə bilərsiniz? Məsələn: əgər sizi narahat edən  işinizdisə dəyişin və ya yaşadığınız yerdisə həmin yerdən köçün və s.

Ətrafınızla əlaqələri gücləndirin. Deprassiyanın əsas tərkib hissəsi təklikdən ibarətdir. Ona görə çalışın əlaqələrinizi itirməyin. Ailə üzvlərinizlə yaxın olun, çalışın hər gün onlarla danışasınız. Dostlarınızla görüş təyin edin və açıq havaya  çıxmaq istəməsəniz də buna özünüzü məcbur edin. Amma sizi qıcıqlandıran, depresiyaya düşməyinizə səbəb olan adam varsa onunla əlaqəni kəsin dostunuz olsa belə.

Yeni maraqlar axtarın. Yeni məşğuliyyətlər tapın, çünki onlar  yeni maraq yaradacaq və vaxtınızın çox hissəsini ona sərf edəcəksiniz. Məsələn: rəqs, toxuma, ev dekoru, otaq bitkiləri  və s.

Başqalarına kömək edin. Özünüzü dəyərsiz, lazımsız hiss edirsinizsə başqalarına kömək edin, çünki bu zaman onların xoşbəxtliyini görüb siz də özünüzü yaxşı hiss edəcəksiniz.

Açıq havada gəzintiyə çıxın. Çox vaxt insanlar depressiyadan çıxa bilmir, çünki  açıq havada olmur. Bunu istəməsəniz belə edin.  Açıq havada gəzmək əhval – ruhiyyəni yaxşılaşdırır.

Yaxşı qidalanın və idmanla məsğul olun. Bu yolla özgüvəniniz yüksələcək. Düzgün qida rejimi və idmanla məşğul olmaqla həm gözəl bədən fiqurasına  malik olarsınız, həm də əhval – ruhiyyəniz yüksələcək. Çalışın günəşli havada açıq havada qaçın, fitnes salona gedin, üzgüçülüklə məşğul olun.

Sonda onu deyək ki,  həyat  çox qısadır və xoşbəxt anlar olur. Bütün hər kəsin problemi var və hamı çalışır. Siz də xoşbəxt olmaq üçün çalışın.Özünüzə yazığınız gəlməklə heç nəyi dəyişə bilməyəcəksiz. Güclü olun və özünüzə dəyər verin. Belə olan təqdirdə hamı sizə dəyər verəcək.