LAZANYA.

Lazım olan ərzaqlar:

• Nazik fətir (yuxa)
• 0,5 kq ət farşı
• 2-3 ədəd pomidor
• 2 ədəd soğan
• 1-2 diş sarımsaq

Beşamel sous üçün:

• 2 stəkan süd
• 100 q kərə yağı
• 4 xörək qaşığı  un

Üst qat üçün:

• 300 q  Holland pendiri (sürtgəcdən keçirilmiş)

Hazırlanışı:

Tavaya duru yağ  töküb ət farşını əlavə edirik. Azca duz vurub ocaqda suyu çıxana qədər (3-4 dəqiqə) bişiririk. Sonra əti boşqaba töküb həmin tavaya xırda doğranmış soğan, sarımsaq əlavə edib soğan saralana qədər qarışdırırıq və ocaqdan gotürürük. Yenə həmin soğanın üzərinə bişirdiyimiz ət farşını töküb xırda doğranmış  pomidor əlavə edib duz-istiotunu vurub 3-5 dəqiqə bişirib götürürük. Qiymə hazırdır.

Başqa qazançaya yağı töküb əridirik. Yag əriyəndən sonra unu əlavə edib dayanmadan qarışdırırıq. Un azca qovrulanda yavaş-yavaş südü əlavə edib yenə dayanmadan qarışdırırıq ki, un topaları qalmasın. Sous azca qatılaşanda ocaqdan götürürük.

İstiliyə davamlı qab götürürük və onu yaxşıca yağlayırıq. Fətiri qabın dibinə düzüb üstündən Beşamel sous çəkirik, daha sonra qiyməni əlavə edirik. Sonra yenə yuxa, sous, qiymə. Ərzağımız bitənə qədər bu işi görürük. Sonda isə fətir qoyub sous tökürük və üzərinə Holland pendiri səpirik. Bu vəziyyətdə 10-15 dəqiqə qoyun kənarda qalsın ki, fətirlər yumşalsın. Daha sonra sobada 180 dərəcədə 15 dəqiqə bişiririk. Üzəri qızaranda sobadan çıxarırıq. Nuş olsun.